ርዕሰ መስተዳድር አቶ አሻድሊ ሀሰን ዛሬ ከጋዜጠኞች ጋር በነበራቸው ቆይታ እንዳሉት በኦሮሞያ እና በቤኒሻንጉል ጉሙዝ ክልሎች ድንበር አካባቢ ይስተዋሉ የነበሩ ግጭቶች ሙሉ በሙሉ መቆማቸውን የጠቆሙ ሲሆን ያለመረጋጋትና ስጋቶችም መቀነሳቸውን አስታውቀዋል፡፡

ተፈጥሮ በነበረው አለመረጋጋት ከአካባቢያቸው የተፈናቀሉ ዜጎችን በአጭር ጊዜ ውስጥ ወደቀያቸው እንዲመለሱ ለማድረግ እየተሠራነው።

የመንግስት ሠራተኞችም ወደሥራ ገበታቸው እንዲመለሱ ይደረጋል ብለዋል፡፡

በሁለቱ ክልሎች ወሰን አካባቢዎች ተፈጥረው በነበሩ ግጭቶች ህብረተሰቡ ለኑሮ ውድነት ተዳርጎ መቆየቱን የገለጹ ሲሆን፣ በአሁኑ ወቅት የአቅርቦቱን ችግር ከመፍታት ጎን ለጎን የዋጋ ጭማሪ በሚያደርጉ ነጋዴዎች ላይም ቁጥጥር አየተደረገ መሆኑን አስታውቀዋል።

ከዚህ በፊት ተፈጥሮ በነበረው ግጭት ምክንያት የተፈጠረ ስጋት እንጂ ከአሶሳ-አዲስ አበባ፣ ከአሶሳ-ከማሺ እና ከአሶሳ-ኦዳ ቡልድግሉ የሚወስዱ መንገዶች መከፈታቸውን አቶ አሻድሊ ገልጸዋል።

እስካሁን ያልተጀመረው የሕዝብ ትራንስፖርት አገልግሎት በቅርቡ እንደሚጀመር ርዕሰ መስተዳድሩ ተናግረዋል።